Iloilo City Local Civil Registry head Juncae Manikan , nagsabat sa show cause order ni Mayor Jerry Treñas

By: JoMaque | Setyembre 24, 2019, 9:26am

Iloilo City — Gin-kwestyun ni Iloilo City Local Civil Registry head Juncae Manikan kon ngaa gin-aksyonan sang opisina ni Mayor Jerry Treñas ang sulat halin sa isa ka Juan Dela Cruz angut sa gin-alegar mga peke nga kasal nga narehistro sa iya opisina.

 Ini ang kaundan sang sabat ni Manikan sa show-cause order nga ginpapanaug ni Mayor Treñas sa iya sang Setyembre 19.

Suno kay Manikan, himo-himo kag “manufactured white paper” ang reklamo nga nabaton sang alkalde bangud wala ma-verify kag wala masumpaan.

Ginpa-athag man ni Manikan nga ministerial lang ang papel sang ila opisina kon ginapresentar sa ila ang marriage certificates para sa registration.  

Ginpadal-an ni Manikan sang kopya sang iya sabat si Presidente Rodrigo Dutere, DILG Secretary Eduardo Año, Civil Service Commission, Philippine Statistics Authority, National Privacy Commission, Judge Victor Gelvezon sang Iloilo RTC kag Judge Beatriz Balmaceda sang Municipal Trial Courts in the Cities-Iloilo.        

Sang nagligad nga bulan, ginpabutyag sang alkalde nga nakabaton siya sang reklamo sang peke nga mga kasal nga na-record sa Local Civil Registry gani iya ginpa-imbestigaran sa City Legal Office kag ginsumiter sa National Bureau of Investigation.