ArchivesLokal

Ginapatihan NPA rebels kag mga soldado sang Philippine Army, liwat nag-engkwentruhanay sa Iloilo

By: Aine Grace Bravo | September 25, 2019

via Aljohn Torreta

Igbaras, Iloilo — Liwat nga naka-engkwentro sang mga soldado sang Philippine Army ang mga ginapatihan New People’s Army sa Barangay Igcabugao, Igbaras pasado las-otso kaina sang aga.

Natabu ini pila ka adlaw matapos nga naka-engkwentro sang mga tropa ang armado nga grupo sa Barangay Ongyod, Miag-ao sa diin isa ka gin-identify sang army official nga rebelde ang napatay kag sa Barangay Dagami, Maasin sang Lunes.

Suno kay Lieutenant Colonel Joel Benedict Batara, commanding officer sang 61st Infantry Battalion, indi magnubo sa 10 ka miembro sang Sibat Platoon sang Southern Front, Komiteng Rehiyon-Panay sa pagpanguna ni certain Melgar Besmanos ang naka-engkwentro sang mga tropa kaina sang aga.

Napunggan suno kay Batara ang plano nga pagsabotahe sang mga rebelde sa hydro power plant sang Century Peak Energy Corporation.

May na-recover ang mga tropa nga blasting cap tag duha ka pakete sang ammonium nitrate kag dinamita kapin 400 metros ang kalayuon sa hydro power plant.

Na-recover man ang tatlo ka Molotov nga bomba kag tag-isa ka rifle grenade kag hand grenade.