Driver sang motorsiklo nga napatay matapos natiruhan sang pulis sa checkpoint sa Sara, ginpaidalum sa paraffin test

By: JoMaque | Setyembre 26, 2019, 9:27am

Iloilo City (UPDATE) — Ginpaidalum sa paraffin test ang driver sang motorsiklo nga natiruhan sang pulis matapos ginpahayag wala nagpondo sa checkpoint kag nagpalupok pa sang pusil sa Barangay Zerrudo, Sara.

Suno kay Lt. Col. Ulysses Ortiz, administrative officer sang Crime Laboratory sa Police Regional Office 6, mahibaluan sa amo nga test kun nakapalupok sang pusil ang napatay nga si Adonis Hontiveros sang Ajuy paagi sa presensya sang gun powder.

Wala pa nakarelease ang Crime Lab sang resulta sang test.

Suno kay Lt. Col. Mario Baquiran, commander sang 2nd Platoon Mobile Force Company nga amo ang nagconduct sang checkpoint, natiruhan sang nagresponde nga pulis si Hontiveros bangud sang imminent danger sa iya kag sang iban pa nga mga pulis sa lugar.

Ginpahayag nagpalupok sang pusil si Hontiveros. Narecover naman sa lugar ang 45 caliber pistol, apat ka bala kag isa ka basiyo.

Ginpanginwala naman ini sang iloy ni Hontiveros nga si Celda. Nanindugan man ang iloy nga wala sang pusil ang iya bata kag wala man sila sang ikasarang sa pagbakal sang pusil.

Sang Setyembre 17 lang nakapauli sa Ajuy si Hontiveros matapos nag-obra sa Manila sang tatlo ka bulan.