Klase sa tanan nga level sa pampubliko kag pribado nga mga eskwelahan sa Iloilo City, suspendido sa Setyembre 30 bangud sa transport strike

By: Aine Grace Bravo | September 26, 2019

via Jeremae Ventar

Iloilo City — Suspendido ang klase sa tanan nga level sa pampubliko kag pribado nga mga eskwelahan sa Iloilo City sa Lunes, Setyembre 30.

Ginpirmahan ni Mayor Jerry Treñas ang Executive Order 89 Series of 2019 subong nga adlaw nga nagasuspender sang mga klase bangud sa himuon nga untat biyahe sang mga transport groups.

Ginabanta naman sa 15 ka mga salakyan sang City Government ang mahimo magamit sang mga ma-stranded nga pasahero.

Suno kay Public Safety and Transportation Management Office (PSTMO) head Jeck Conlu, magluwas sa 15 ka salakyan may koordinasyon man sila iban nga government agencies pareho sang Bureau of Fire Protection kag Philippine Coast Guard.

Ma-coordinate man ang syudad sa Provincial Government.

Mapahamtang ang PSTMO upod sa City Risk Reduction and Management Office sang Command Center para mag-monitor sang mangin sitwasyon sa Lunes.