Philippine Army, nag-abiso sa mga turista nga likawan ang nabukid nga bahin sang Igbaras kag Miag-ao bangud sang sunod-sunod nga mga engkwentro

By: Aine Grace Bravo | September 26, 2019

via Aljohn Torreta

Iloilo — Nag-abiso ang Philippine Army sa mga turista nga likawan anay ang pagkadto sa mga tourist destinations sa nabukid nga bahin sang Igbaras kag Miagao kasunod sang asod-asod nga mga engkwentro.

Suno kay Lt. Col. Joel Benedict Batara, commanding officer sang 61st Infantry Battalion sang Philippine Army, mas maayo nga likawan anay ang pagsaka sa bukid sa nasambit nga lugar agud malikawan nga maipit ukon maulamid sa posible pag-engkwentrohanay liwat sang mga rebelde kag tropa sang gobyerno.

Naga-coordinate na ang Philippine Army sa mga Local Government Units sang Igbaras kag Miagao angut sini.

Suno kay Miagao Mayor Macario Napulan, istoryahan pa nila sa Municipal Peace and Order Council ang lihok.

Una na nga nagpanawagan si Mayor Napulan sa mga pumuluyo sa ila banwa ilabi sa mga barangay sa nabukid nga bahin nga likawan anay ang pagsaka sa bukid sa pagkadto sa ila mga uma agud malikawan ang mga insidente.

Ginakuhaan pa sang Aksyon Radyo Iloilo sang pahayag ang LGU –Igbaras angut sini.