Transport group sa Panay, maga-upod sa nationwide transport strike sa Setyembre 30 agud pamatukan ang pag-phase out sang mga PUJs sa masunod nga tuig
By: JoMaque | Setyembre 26, 2019, 9:24am
Iloilo City – Madayon ang untat biyahe sang nagkalain-lain nga transport groups sa Iloilo sa Lunes, Setyembre 30.
Suno kay Pinagkaisang Samahan ng mga Tsuper at Opereytor Nationwide (PISTON) -Panay President Edgar Salarda, may tig-ulo nga “Alyansa Kontra PUV phase out” ang himuon nga transport strike sa Iloilo.
Nagpasalig na suno kay Salarda ang magkatuhay kag dalagku nga transport groups nga maupod sila sa transport strike lakip ang mga tricycle kag taxi.
Ginpahayag ni Salarda nga sabat nila ini sa statement ni Department of Transportation (DOTr) Secretary Arthur Tugade nga dapat dulaon na ang mga daan nga PUJ’s sa Hulyo 2020 kag buslan sang bag-o.
Hugot nila nga ginapamatukan ang pag-phase out bangud maapektuhan ang ila palangabuhian.
Padayon man ang panawagan ni Salarda sa iban pa nga grupo nga mag-upod sa ila kawsa.
Magluwas sa Iloilo, magapatuman man sang untat biyahe sa iban nga lugar sa pungsod.