Una nga adlaw sang temporaryo nga pagsaylo sang mga pump boats sa Muelle Loney, nangin masulhay
By: Aine Grace Bravo | September 26, 2019
via Francisco Enar
Iloilo City — Wala sang nakita nga problema sa pagsaylo sang mga pump boats nga may biyahe Iloilo City-Guimaras vice versa sa Muelle Loney.
Ginbutangan sang Public Safety and Transportation Management Office sang mga tents sa Esplanade agud masilungan sang mga pasahero.
Aga pa nga nagpadulong sa lugar si PSTMO Head Jeck Conlu agud ma-monitor ang sitwasyon kag masiguro nga may order kag safe ang mga pasahero.
On-call naman ang Iloilo City Emergency Responders agud makaresponder gilayon kon may emerhensya, samtang naka-standby sa Freedom Grandstand ang ambulansya sang Provincial Government sang Guimaras.
Ginadumilian ang pag-standby ukon pag-parking sang mga salakyan sa Muelle Loney Road. Pasugtan lang suno kay Conlu ang mga tricycle kag taxi nga magdul-ong kag maka-pick-up sang pasahero, pero indi sila makatenir.
Duha ka semana nga magadungka sa Muelle Loney ang mga pump boats bangud sa dredging sa Iloilo River.