7 units sang modernized jeepneys sang transport cooperative, nag-abot na sa Iloilo City

By: JoMaque |

Iloilo City — Ginparada sang Iloilo City Alliance Operators and Drivers Transport Cooperative ukon ICAODTC sa syudad ang ila gin-acquire nga pito ka units sang modernized jeepneys subong nga adlaw.  

Ini bilang pagpakita sang suporta sang kooperatiba sa PUV modernization program sang gobyerno.

Suno kay Mr. Rizalito Alido, board secretary sang ICAODTC magluwas sa pito ka units nga una nag-abot, may 21 pa ka units nga manug-abot naman sa masunod nga bulan agud makompleto ang 28 ka units nga magabiyahe sa Jaro CPU Ungka ITGSI nga ruta.

May ginatapos pa sa papeles sang mga salakyan suno kay Alido para lubos na ini nga ma-biyahe.

Magluwas sa Jaro CPU Ungka ITGSI nga ruta, may units man nga maabot agud magbiyahe sa Villa Baybay, Ungka-Diversion, kag Jaro Plaza-Mandurriao.

 Air-conditioned ang kada unit, may CCTV camera, dash cam, kag may Automatic Fare Collection System. 

May 25 ka seating capacity ang kada-unit kag puwede makatindog ang napulo ka pasahero.        

Ginalauman ni Alido nga sa masunod ng bulan matapos na ang papeles sang mga salakyan agud makasugod na sa pagbiyahe.