Truck nga may karga nga sinako sang saging, nakabunggo sa poste sa Calinog; 1 patay, 6 pilason

By: JoMaque | Setyembre 29, 2019, 11am

Calinog, Iloilo — Patay ang driver sang truck samtang pilason ang anum niya ka pasahero sang nadulaan sang control sa manibela ang driver kag nakabunggo sa poste sa Barangay Libot, las 3:45 kaina sang kaagahon.

Ginkilala ang driver kay Beam Pearl Gallego, 34-anyos sang Barangay Badu, Calinog.

Suno kay Police Staff Sergeant Radnie Merasol, imbestigador sang Calinog MPS, halin sa Barangay Badu ang salakyan kag nagapakadto sa Iloilo City karga ang sinako nga saging sang naglamsot ang preno sang truck.

Naglumpat suno sa iya si Gallego sa salakyan kag naigo sa semento ang iya ulo.

Gindala pa sa ospital si Gallego apang gindeklarar nga napatay bangud sang pilas sa ulo.

Pilason naman ang anum niya nga ka pasahero nga sanday Nonamae Lilia, upod ang iya bana nga si Rucel Lilia; Estrelieta Lastimoso kag iya bana nga si Noel; Adiano Carisma, lunsay pumuluyo sang Barangay Badu, kag si Alyas Apa sang Toyungan, Calinog.