Lalaki, nabun-an patay sang iya katrabaho sa bakeshop sa La Paz

By: JoMaque | Setyembre 30, 2019, 8:34am

Iloilo City  — Gindala pa sa ospital ang 26-anyos nga empleyado sang bakeshop apang napatay matapos nabun-an sang iya katrabaho samtang naga-inom inom sa Ledesco Village, Barangay Tabuc Suba, La Paz kahapon, Setyembre 29.

May pilas sa dughan kag wala nga kilid ang biktima nga si Gelcor Malungayon sang Pilar, Capiz.

Suno sa 22-anyos nga suspetsado nga si Steven Antiqueña sang Balabag, Anilao, nag-inaway sila sang biktima matapos siya ginsukmaan nga gina-“torotot” niya ang “nobya” ni Malungayon.

Una nga ginpanginwala sang suspect nga ginbuno niya ang biktima apang gin-ako niya ini sang liwat nga ginkuhaan sang pahayag.

Wala narecover ang kutsilyo nga gingamit sa krimen.

Sa inisyal nga imbestigasyon sang pulis, ginsumbag ang suspect sang biktima tubtob nga nag-inaway sila kag nabun-an si Malungayon.

Suno kay Police Lieutenant Edgar Pagot, deputy chief of police sa La Paz Police Station, preso si Antiqueña kag natalana pasakaan sang kaso.

Ginkumpirmar naman ni Pagot nga naga-istoryahanay parte sa babaye ang biktima kag suspetsado antes nagluntad ang krimen.