PSTMO Head Jeck Conlu, kumpiyansa nga makapasar ang Iloilo City sa road clearing operations

By: JoMaque | Oktubre 1, 2019, 11:14am

Iloilo City – Kumpiyansa si Public Safety and Transportation Management Office (PSTMO) Head Jeck Conlu nga makapasar ang syudad sa validation sang team halin sa Department of Interior and Local Government (DILG) angut sa road clearing operations.

Nagtakup sang Setyembre 29 ang 60 ka adlaw nga ginhatag ni DILG Secretary Eduardo Año para sa mga local chief executives agud hawanan ang mga public roads sa anuman nga obstructions.

Nagsugod naman subong nga adlaw ang paglibot sang validation team sa syudad agud i-validate ang report sang LGU suno kay Conlu.

Sa pag-obserbar ni Conlu, halos wala na sang vendors nga nagbalik sa mga sidewalks, pero gin-ako nga may mga karsada pa nga may on-road parking. May ginahimo naman suno sa iya nga mga paagi ang PSTMO agud ma-address ang nasambit nga problema.

Nagapati si Conlu nga nagakaigo ang accomplishment sang syudad agud indi masuspender si Mayor Jerry Treñas.