ArchivesLokal

‘Satisfactory,’ rating sang DILG sa road clearing accomplishment sang Iloilo City

By: Aine Grace Bravo | October 3, 2019

via Firingline

Iloilo City — 70 tubtob 80 porsyento ang ginhatag nga rating sang Department of Interior and Local Government (DILG) validating team sa accomplishments sang Iloilo City sa road clearing.

Ini ang pahayag ni DILG – Bacolod City Director Ma. Joy Marideth Madayag, nga amo ang nagpanguna sa validation sa report sang Iloilo City LGU.

DILG- Bacolod City ang nag-validate sa accomplishments sang Iloilo City samtang DILG-Iloilo City naman ang nag-validate sa report sang Bacolod City.

Suno kay Madayag, wala man sang perpekto nga rating bangud may nakita pa sila nga mga obstructions sa mga dalanon sang ila ginlibot.

Lakip sa ila nakita ang naga-illegal parking, magagmay nga illegal structures kag mga basura. Pero minor na lang nga obstructions suno sa iya ang ila nakita.

Natumod naman ang kabaranggayan nga may mga obstructions pa sa dalanon kag napahibalo naman ang mga barangay officials.

Bisan nagtakop na sang Setyembre 29, 2019 ang direktiba ni Presidente Rodrigo Duterte nga hawanan sa mga obstructions ang mga public roads, dapat ini nga i-mentinar suno sa DILG.

Isumiter ni Madayag ang ila validation report sa DILG- Regional Office nga amo naman ang ma-forward sa Central Office.