ArchivesLokal

Mga barangay officials sa Calaparan, Arevalo, handa pasugtan ang pagpatindog sang garage terminal sang Calumpang Iloilo Transport Service Cooperative kon makumpleto ang mga requirements

By: Aine Grace Bravo | October 5, 2019

Iloilo City — Handa ang mga barangay officials sang Calaparan, Arevalo nga pasugtan ang pagpatindug sang garage terminal sang Calumpang Iloilo Transport Service Cooperative (CITSCO) kon mahitsu sang tag-iya ang tanan nga requirement.

Ini ang kondisyon sang mga opisyal matapos nagpasar sang resolution sa pagpa-untat sa construction sang proyekto.

Suno kay Barangay Kagawad Rodrigo Montaño, kinahanglan nga mag-conduct sang public hearing ang tag-iya sang garage terminal agud mahibaluan ang sentimiento sang mga pumuluyo.

Pananglitan suno sa iya nga pabor ang mga pumuluyo kag magpresentar sang kompleto nga mga dokumento ang tag-iya, wala na sang rason agud balabagan ang proyekto.

Gin-athag ni Montaño nga wala sila nagapamatok sa PUV Modernization Program sang gobierno. Luyag lang nila nga mag-agi sa husto nga proseso ang tanan.

Ginpahayag naman ni CITSCO Chairperson Evangeline Enrile nga naghambal ang mga barangay officials nga luyag sang tanan nga pumuluyo nga maghimo sang public hearing pero wala sila nagpasugot bangud indi suno sa iya apektado sang proyekto ang mga residente malapit sa higad sang baybay. Ang mga taga-DENR kag Department of Agrarian Reform lang dapat suno sa iya ang imbitaron sa public hearing.

Pamangkuton pa ni Enrile ang ila manager kon i-schedule ang public hearing.