80-90%, nabuhin sa turismo sa Guimaras kasunod sang August 3 sea tragedy –DOT 6

By: Aine Grace Bravo | October 7, 2019

via Hotline

Iloilo City — 80 tubtob 90 porsiento ang pagnubo sa turismo sang Guimaras kasunod sang nagluntad nga sea tragedy sang Agosto 3.

Base ini sa assessment sang Department of Tourism (DOT) 6.

Suno kay DOT 6 Director Helen Catalbas, 10% na lang ang nabilin bangud wala na ang mga vans kag tour buses nga nagatabok sa amo nga probinsiya.

Ginpahayag ni Catalbas nga mga independent travellers na lang kag diutay nga grupo sang mga turista ang nagakadtu sa Guimaras.

Apektado suno kay Catalbas ang transportation system sa probinsiya.

Bisan nagdamo ang mga sea vessels nga nagatabok sa Guimaras, unreliable naman suno sa iya ang availability para sa mga tour operators.

Dugang niya, wisik lang ang nagakadto nga mga turista sa Guimaras halin sa Iloilo City bangud apektado ang transport system.

Magluwas sa transportation system, apektado man ang hotels and restaurants sa Guimaras.

Nangin positibo naman suno kay Catalbas ang resulta sang Inter Agency Dialogue on Guimaras Tourism nga ginpatawag sang DOT 6 sang nagligad nga semana.

Ginpabutyag ni Catalbas nga indi niya mapabay-an ang Guimaras bangud malapit ini sa Iloilo City nga amu naman ang major gateway sa Rehiyon 6.

Ginpresentar suno sa iya ni Governor Samuel Gumarin sa dialogue ang “before and after” sang August 3 sea tragedy kag daku gid ang pagnubo sang turismo sang probinsiya.

Base sa record sang DOT 6, nagalab-ot sa 49,000 ka mga turista ang nagatabok sa Guimaras sang 2018 pero sang natabu ang trahedya sang Agosto 3, nagnubo ini sa 19,000.