5 mayors sa Iloilo, gina-imbestigaran sang IPPO matapos na-monitor nga nagasuporta sa NPA — IPPO Director

By: JoMaque | Oktubre 7, 2019, 9:40am

Iloilo — Mahimo pasakaan sang kaso ukon i-report sang Iloilo Police Provincial Office sa Department of the Interior and Local Government agud ma-suspend ang kapin lima ka mga mayors sa probinsya sang Iloilo nga ginapatihan nagasuporta sa New People’s Army (NPA).

Suno kay IPPO Director Roland Vilela, gina-imbestigaran pa nila ang wala ginhingadlan nga mga mayors apang una nila nabaton ang amo nga impormasyon sang nagligad nga eleksyon.

Ginpahayag nagbayad sang tubtob P200,000 ang mga natungdan para sa permit to campaign agud makapangampanya sa lugar nga may presensya sang NPA.

Naglab-ot naman sa P300,000 ang ginasukot sang mga rebelde kabaylo sang direkta nga pagpangampanya sa natungdan nga mga kandidato.

Ginkumpirmar ni Vilela nga halin sa First, Second kag Third District sang probinsiya ang kapin lima ka mga mayors nga ginapatihan nagasuporta sa NPA.

‘May iban pa’

Ginkumpirmar man ni Vilela nga may gina-imbestigaran man sila nga indi maglampas sa napulo ka mga local officials halin vice mayor tubtob konsehal nga ginapatihan nagasuporta man sa NPA. Nagpanawagan si Vilela sa mga local officials nga untatan na ang pagsuporta sa mga rebelde agud mauntat na ang extortion activities.

Nagpasalig naman ang opisyal nga handa ang pulis sa paghatag sang security sa mga local officials kun may pamahog sa ila ang mga rebelde.