47 anyos nga mangunguma, nasapwan patay kag may mga pilas sang pagkalabu sa Sta. Barbara

By: Aine Grace Bravo | October 9, 2019

via Angel Mae Ciudad

Sta. Barbara, Iloilo — Patay na sang nasapwan ang 47-anyos nga mangunguma sa Barangay Tuburan, Sta.Barbara kaina sang aga.

Ginkilala ang biktima kay Elmo Susmiran sang amo man nga lugar.

Suno sa asawa nga si Rosalie Susmiran, las-kuwatro kahapon sang hapon naghalin sa ila balay ang iya bana kag nagkadto sa balay sang iya kumpare para mag-imbitar sa iya birthday buwas.

Ginpahayag naman ni alyas Joy, bata sang kumpare ni Susmiran, las-nueve kagab-i, naghalin sa ila balay ang biktima.

Nag-inom-inom pa si Susmiran sa balay sang iya kumpare.

Una nga nakakita sa bangkay sang biktima ang iya bata nga lalaki.

May mga pilas sang pagkalabu sa lain-lain nga parte sang iya lawas si Susmiran.

Indi pa matumod kon ano ang motibo sa krimen.