‘Bangud sa kapigaduhon kag kadamuon namon, indi na namon mahatagan attention ang amon palibot ‘ – iloy sang lima ka mag-ulutod nga na-rescue sang CSWDO sa Bo. Obrero

By: JoMaque | Oktubre 9, 2019, 12:49pm

Iloilo City — Masaku sa pagpangita sang kalan-on ang ginikanan sang lima ka mag-ulutod nga na-rescue sang City Social Welfare and Development Office (CSWDO) sa Bo. Obrero, Lapuz.

Ini ang rason ni alyas Nida kon ngaa indi na nila mahatagan sang tiun ang pagpanglimpyo sa palibot.

Suno kay Nida, mabudlay ang ila pangabuhi bangud sa kadamuon nila.

Gin-athag naman ni Nida nga indi sila bulagay sang iya nga bana, apang layu-ay lang sila bangud kinanglan nila mag-ubra. Nagpa-Manila si Nida samtang naga-trabaho sa construction sa Guimaras ang iya bana.

Ginpahayag ni Nida nga nag-desisyon siya nga magpasimpalad sa Manila bangud nabudlayan siya paiguon ang iya sweldo kun sa Iloilo lang ma-obra.

Mapauli si Nida agud makapakigsapol sa Crisis Intervention Unit (CIU) kag social worker sa La Paz para ma-istoryahan kun ano ang maayo sa iya kabataan. Na-istorya man ni Nida ang iya bana nga matenir na lang sa Iloilo agud bantayan kag giyahan ang ila kabataan samtang ma-obra siya sa Manila.

Dugang pa sang iloy, indi niya mabasol ang iya subang nga bata bangud bata pa lang ini kag ginhatagan na sang daku nga responsibilidad sa pagbantay sang iya mga manghod.

Gin-rescue sang CSWDO ang mag-ulutod sang nag-viral ang litrato sang ila pagpangayo-kayo sang pagkaun. Magluwas sa lima ka mag-ulutod, upod man nila ang isa ka tuig nga bata sang 19 anyos nga kamagulangan nga bata.