PMAJ Jovie Espenido, ma-courtesy call sa PRO 6 sa masunod nga semana; Espenido, wala pa makahibalo kon diin siya i-assign sa Western Visayas

By: Aine Grace Bravo | October 9, 2019

via Hotline

Iloilo City — “Ginagawa ko lang ang trabaho ko.”

Ini ang pahayag sang kontrobersiyal nga si Police Major Jovie Espenido nga kumpirmado na nga magasaylo sa Police Regional Office 6 halin sa Police Regional Office 10 partikular sa Ozamiz City.

Ang pahayag ginhimo ni Espenido sang ginpamangkot sang Aksyon Radyo Iloilo kun may “ipapatay” sa pag-assign sa iya sa Region 6.

Si Espenido ang nangin kontrobersiyal bangud sa pagkapatay sang mga alkalde sa diin siya na-assign bangud sa isyu sa druga.

Si Espenido ang na-assign sa Albuera, Leyte sang napatay si the late Albuera Mayor Rolando Espinosa sang 2016 kag siya man ang hepe sang Ozamiz City Police Station sang napatay si the late Mayor Reynaldo Parojinog.

Sa kaso ni Espinosa, ginpahayag ni Espenido nga gin-proteksyunan pa niya ang alkalde. Pero siya ang ginbasol sa kamatayon sini bangud siya ang nakadakop. Suno sa iya, nag-execute sadto sang affidavit si Espinosa nga nagbuyagyag sang mga drug protectors. Ginhingyo pa niya nga i-custody ang alkalde pero ginsaylo ini sa jail nga ginadumalahan sang provincial government. Ang gobernador suno sa iya nalakip sa affidavit ni Espinosa nga nagbuyagyag sang mga protectors. Naghimo suno kay Espenido sang scenario sadto kag gin-raid ang prisuhan sa diin napatay si Espinosa.

Sa natabu naman kay Parojinog, ginpa-athag ni Espenido nga naghimo siya sang maid-id nga background checking kag ginhatagan sang tsansa ang alkalde pero nagpadayon ang aktibidad sini sa druga kabangdanan natabu ang raid sa diin siya napatay.

‘AKO ANG SINISISI PERO HINDI AKO GUILTY’

Dugang ni Espenido, impresyon lang sang tawo nga may nagakapatay kun diin siya na-assign pero suno sa iya kun diin man ang iya assignment, nagahimo gid siya sang maid-id nga imbestigasyon kag wala nagapati sa mga ginasugid lang sa iya.

Ginakunsiderar man niya ang kinamatarong sang tawo nga target i-operate.

Indi man puwede suno sa iya nga manduan siya sang kun sin-o nga wala sang nagakaigo nga imbestigasyon.

Ginpahayag pa ni Espenido nga kun may sala gid man siya, siya na ang bahala nga manabat sa Maka-ako.

Sa Oktubre 15 posible maabot si Espenido sa Iloilo para mag-courtesy call sa director sang PRO 6 sa Camp Delgado.

Ginpa-athag man niya nga base pa lang sa impormasyon ang nagalapta nga i-assign siya sa Bacolod City Police Office pero sa order nga iya nabaton, PRO 6 lang ang nakabutang. Ang PRO 6 na suno sa iya ang magadesisyon kun diin sa rehiyon siya i-assign.