Total ban sa live swine, pork kag pork products halin Luzon, ginaduso sang grupo sang swine raisers

By: JoMaque | Oktubre 9, 2019, 12:45pm

Iloilo – Nagpakigkita kay Gov. Arthur Defensor Jr. ang mga miyembro sang Iloilo-Bacolod Association of Veterinary Sales Representatives sa pagpanguna sang ila presidente nga si Maria Fe Sy sang Oktubre 7.

Ginhingyo sang grupo ang pag-imponer sang total ban sa live swine, pork kag pork products halin sa Luzon.

Ini agud indi makasulod sa probinsya ang African Swine Fever (ASF).

Sang Setyembre 19, nag-isyu sang executive order si Defensor nga nagadumili sang swine, pork, pork products, kag by-products halin sa mga areas nga gindeklarar sang Department of Agriculture (DA) nga may positibo nga kontaminasyon sang ASF.

Ginkumpirmar sang DA ang ASF outbreak sa Rizal kag Bulacan. Positibo man nga may ASF sa Latvia, Poland, Romania, Russia, Ukraine, Luxembourg, Belgium, Bulgaria, Moldova, Vietnam, Cambodia, Myanmar, Lao People’s Democratic Republic, South Korea kag China.

Mapadala si Gov. Defensor sang sulat kay Atty. Hansel Didulo, assistant secretary for the Visayas sang DA, para sa legal bases kag guidance sa ginapangayo sang mga swine raisers.