(UPDATE) Pamilya sang 18 anyos nga babaye nga nagbitay sa lodging house sa Molo, nagapati nga wala sang foul play sa natabu

By: Aine Grace Bravo | October 9, 2010

via Hotline

Iloilo City — Nagapati ang pamilya sang 18-anyos nga babaye nga nagbitay sa hulot sang lodging house sa Molo nga wala sang foul play sa iya kamatayon.

Na-interview sang Aksyon Radyo Iloilo ang lolo sang babaye nga si alyas LJ kag suno sa iya, nagapati sila nga nag-suicide ang ila himata.

Wala lang nahibaluan sang lolo (hinablos niya ang amay ni LJ) sang rason sang paghikog sang iya apo.

Kamagulangan si LJ sa tatlo ka mag-ulutod kag nagatrabaho bilang singer sa banda.

May anak si LJ nga manug-isa ka tuig. Naga-estar si LJ sa Pavia.

Ginpahayag sang lolo nga Lunes sang ulihi niya nakita ang apo pero wala man sang may nasugid nga problema.

May impormasyon man ang lolo nga updanay pa si LJ kag ang iya live in partner kahapon sang hapon.

Nanaug sa awto si LJ sa atubang sang Molo Mansion antes nagsakay sa taxi kag nagpadul-ong una sa Sofia Lodge.

Ginpahayag naman sang driver sang taxi nga si Manny Salazar nga nangita sang kuwarto nga may hagdan si LJ sa Sofia Lodge pero bangud wala sang bakante nagsaylo sila sa Dragon Lodge sa diin na siya nagbitay gamit ang habol.

Kalma man suno kay Salazar ang babaye sang nagsakay sa iya taxi kag naghambal pa nga mapahuway lang siya sa lodging house.

Nag-order pa si LJ sang chopsuey pero sang gindul-ong na sang room boy nakita na lang siya nga nagabitay.

Ginhingagaw pa siya dala sa ospital pero wala na natabangan.