BCPO Director Henry Biñas, ginakunsiderar ang pag-assign kay PMAJ Jovie Espenido sa Drug Enforcemetn Unit

By: JoMaque | Oktubre 10, 2019, 8:25am

Bacolod City — Ginakunsiderar ni Bacolod City Police Office Director Henry Biñas ang pag-assign kay Pol. Maj. Jovie Espenido sa City Drug Enforcement Unit.

Suno kay Biñas, gina-assess pa niya ang qualifications ni Espenido apang posible nga i-assign siya sa iya “specialization.”

Masapol man si Biñas sa iya staff natuhoy diri.

Base sa rangko ni Espenido, mahimo siya mangin hepe ukon ma-assign sa BCPO suno kay Police Regional Office 6 Spokesperson Joem Malong.

Kun maaprubahan naman ang pagtaas sa rangko ni Espenido nga Lieutenant Colonel, mahimo na siya mangin Deputy Director.

Nangin kontrobersiyal si Espenido matapos napatay sa police operation ang mga alkalde sang Albuera, Leyte kag Ozamiz City sa diin siya nagpungko bilang hepe.

‘TAG-DUHA ANG GINAPUNGKUAN NGA POSISYON’

Duha ka police officials sa BCPO ang nagapungko sa tag-duha ka posisyon.

Suno kay Biñas, chief sang Investigation Section kag City Drug Enforcement Unit si Police Major Ariel Artillero samtang Deputy for Operations kag head naman sang Police Community Relations si Police Lieutenant Colonel Ariel Pico.

Kun wala sang conflict sa mga nagapungko, posible ma-assign si Espenido sa isa sa nasambit nga mga posisyon.

Ginmandu ni PNP chief Oscar Albayalde ang pag-assign kay Espenido sa Police Regional Office 6 halin sa Ozamiz City sugod sang Oktubre 4.

Nagpadala naman sang instruksyon ang PNP Directorate for Personnel and Records Management nga sa Bacolod City i-assign ang kontrobersiyal nga pulis.

Ginkumpirmar naman ni Espenido nga sa Oktubre 15 pa siya ma-abot sa PRO 6 para mag-courtesy call kay PRO 6 Director Rene Pamuspusan.