Driver sang pribado nga salakyan, nagreklamo nga ginhampak sang naga-marshal sa vips ang iya side mirror sa General Luna flyover; pulis nga nag-marshal, nagklaro nga indi niya hungod ang natabu

By: Aine Grace Bravo

via Hotline/Farrah Mae Morano

Iloilo City — Nagreklamo si alyas Boy nga ginhampak sang naga-marshal sa salakyan sang mga VIPs ang side mirror sang iya salakyan.

Suno kay Boy, nagapanaug na siya sa General Luna flyover mga las-8:55 kahapon sang aga, Oktubre 10, sang nasugata ang duha ka motorsiklo nga nagaserbe marshal sa VIP nga mga salakyan.

Nakita ni Boy nga malapit na sa center lane sang two-lane flyover ang duha ka motorsiklo, kag sang nagtupong sa iya, mabaskug nga ginhampak sang driver sang ikaduha nga motorsiklo ang iya side mirror agud nga magpahigad siya kag maka-agi ang salakyan sang mga VIPs.

Nagpa-blotter sa Police Station 1 si Boy kag naghingyo sang bulig agud ma-identify ang naghampak.

Magluwas nga nagliw-as ang side mirror sang iya salakyan, delikado man ang ginhimo sang naga-marshal suno kay Boy.

Wala na natalupangdan ni Boy kon taga-TMTRO ukon pulis ang marshal, pero nakita niya nga may vest nga suksok.

Nanginwala naman si Public Safety and Transportation Management Office Head Jeck Conlu nga mga traffic aides sang TMTRO ang ginareklamo.

Posible suno sa iya nga police ang nag-upod sa convoy sang mga VIPs bangud wala man siya sang gin-deploy nga mga traffic aides kahapon.

‘SABAT SANG PULIS’

Gin-ako naman ni PSSg Arney Bañas, assign sa Traffic Investigation Enforcement Unit sang Iloilo City Police Office (ICPO), nga siya ang ginatumod ni alyas Boy.

Ginklaro ni Bañas nga indi niya hungod ang natabu.

Suno sa iya, lead marshal siya sang VIPs (nga sanday Sen Franklin Drilon kag DOT Sec. Bernadette Puyat).

Pataklad sila sa overpass kag nag-wave siya bilang hand signal agud maghinay ang mga salakyan nga nagapadulhog.

Nakibot man siya bangud may naigo ang iya wala nga kamot.

Nagapangayo pasaylo si PSSg Bañas sa natabu.