ArchivesLokal

Jeep nga ginasakyan sang mga boy scouts pakadto sa camping sa Lambunao, naaksidente; 4 pilason lakip ang iloy nga na-utdan sang kamot

By: Aine Grace Bravo | October 11, 2019

via KhenJo Terco

Lambunao, Iloilo — Naaksidente ang jeep nga ginasakyan sang mga boy scouts sa Maribong, Lambunao pasado las-7:30 subong nga aga.

Suno kay Police Staff Sergeant Rexxan John Engada, imbestigador sang Lambunao Police Station, sakay sang Pretty Boy nga jeep ang 40 tanan ka mga tawo nga ginalakipan sang mga boy scouts, ila manunudlo kag guardians.

Driver sang jeep si Ivy Sumandi sang Cunarum, Lambunao samtang ang konduktor amo si Allan Cordero.

Halin sa Panuran Elementary School sa Lambunao ang mga sakay sa jeep kag magatambong kuntani sa district camping sang Lambunao West sa Barangay Maribong sang naaksidente.

Apat ka pasyente ang gindala una sa ospital sa Calinog nga amo sanday:

1. Mary Jean Jaque, 38-anyos sang Panuran, Lambunao (nautdan sang kamot)
2. Marvin Jaque, may pilas sa kamot (bata ni Mary Jean), Panuran, Lambunao
3. Maria Wesin Mamon, may pilas sa kilay kag sag-ang, Panuran, Lambunao
4. Susanita Luceno, may pilas sa butkon

Gin-refer ang apat sa ospital sa siyudad sang Iloilo.

Outpatient naman ang iban pa nga mga sakay.

Ginpahayag naman ni Tabucan, Calinog Barangay Kagawad Ronald Sustento nga nakalabay sa lugar, naglamsot ang preno sang jeep rason nga nakabunggo sa mahogany.

Nagapadayon pa ang imbestigasyon sang mga police.