Boy Scouts of the Philippines-Iloilo, nagpasalig sang bulig sa mga na-aksidente nga campers sa Lambunao

By: JoMaque | Oktubre 12, 2019, 8:51am

Lambunao, Iloilo — Nagpasalig ang Boy Scouts of the Philippines (BSP) Iloilo sang bulig sa mga campers nga na-aksidente samtang padulong sa ila camping sa Barangay Maribong kahapon sang aga, Oktubre 11.

Suno kay Mr. Eric Dumdumaya, Council Scouts Executive sang BSP-Iloilo, naka-register sa BSP ang mga kabataan gani sigurado nga may makuha sila nga financial assistance.

Depende sa degree sang injuries sang kabataan ang ila makuha nga bulig. Halin P5,000 tubtob P10,000 suno kay Dumdumaya ang pwede makuha nga medical reimbursement sang mga kabataan.

Tinguhaan ni Dumdumaya nga ikonsulta sa board kun ano ang pwede mabulig sang Boy Scouts sa mga ginikanan nga na-ulamid sa aksidente.

Gin-abisuhan naman ni Dumdumaya ang mga participants sa 2019 Boy Scouts of the Philippines, Iloilo Council Jamborette sa Oktubre 22 tubtob 27 nga siguraduhon gid ang salakyan nga i-service padulong sa camp site kag siguraduhon nga kilala ang driver.