Maestra sa Cagayan de Oro nga nag-post sa social media sang ‘no rice to eat’ excuse letter sang iya estudyante, nalipay nga madamo ang nagbulig sa estudyante

By: Aine Grace Bravo | October 14, 2019

via Hotline

Iloilo City — Nagapasalamat si Teacher Jen Marie Dullente sang Bugo National High School sa Cagayan de Oro nga nangin instrumento siya agud mabuligan ang iya estudyante sa Grade 7 nga si Jerom.

Nahibaluan ang kahimtangan ni Jerom sang gin-post ni Dullente ang excuse letter nga ginpadala sang iloy nga nagapabutyag nga absent ang iya anak sang tatlo ka adlaw bangud wala sila sang bugas kag wala man nakabiyahe sang trisikad ang iya amay.

Sa interview sang Aksyon Radyo Iloilo, ginpahayag ni Dullente nga na-istorya niya ang mga ginikanan ni Jerom matapos nag-viral ang gin-post niya nga excuse letter kag nagpahibalo nga madamo sang luyag nga magbulig sa ila.

Nagpasalamat man suno sa iya ang pamilya kag nagpromisa nga indi na mag-absent sa iya klase si Jerom.

Gin-athag ni Dullente nga wala man siya nagapangayo sang bulig sa iya pag-post sang excuse letter kundi luyag niya mapahibalo sa iban nga indi upang ang kapigaduhon sa pag-eskuwela.

May tiun suno sa maestra nga luyag man ni Jerom nga magbiyahe sang trisikad ilabe na kun nagamasakit ang iya amay pero wala siya ginapasugtan.

Nagabulig na lang si Jerom sa iya iloy sa mga ulubrahon sa balay.

Ginpahayag ni Dullente nga first time niya nakabaton sang excuse letter nga indi maka-eskuwela ang estudyante bangud wala sila sang bugas.

Very genuine suno sa iya ang kaundan sang sulat.

Sang nagbisita si Dullete sa balay sang pamilya ni Jerom, nakita niya kun ano kapigado ang ila sitwasyon.

Wala sila sang tubig, wala sang elektrisidad, wala sang salog ang ila balay kag madamu pa sang buslot ang dingding

Pero sa pihak sang ila sitwasyon, ginahambalan sang amay ang iya mga bata nga magtinguha sa ila pag-eskuwela

Si Jerom lang kag ang iya magulang nga babaye ang naga-eskuwela sa siyam sila ka mag-ulutod gani nagatinguha gid sila sa ila pagtuon.

Nalipay naman si Dullente sa natabu sa pamilya ni Jerom sa madamo nga nagbulig matapos nag-viral ang iya post.