VIPs, exempted sa traffic rules — LTO 6

By: Aine Grace Bravo | October 15, 2019

via KhenJo Terco

Exempted ang mga VIPs sa mga traffic rules.

Iloilo City — Suno kay Land Transportation Office 6 Deputy Chief for Operation Jojo Jamerlan, isa ini sa mga prebilehiyo nga ginhatag sa mga VIPs.

Isa sa mga gin-halimbawa ni Jamerlan ang red ukon stop light. Mahimo suno sa iya maka-diretso ang convoy sang VIP bisan pa nga naka-on ang stop light ilabe na kun escorted sila sang Highway Patrol Group (HPG).

May ginalagas kun kaisa nga oras ang mga VIPs suno sa iya ukon limitado ang ila tiyempo gani indi sila pwede ma-delay. Halimbawa diri kun may ginalagas sila nga flight dugang pa ni Jamerlan.

Sang Oktubre 10, nagreklamo si alias Boy nga ginhampak sang marshal sang VIPs nga sanday Sen. Franklin Drilon kag Tourism Secretary Bernadette Romulo-Puyat ang side mirror sang iya salakyan sang nagsugat-anay sila sa flyover sa Gen. Luna St. sa City Proper.

Gin-ako naman ni PSSg Arney Bañas nga siya ang police nga gintumod ni Boy pero indi niya hungod suno sa iya nga maigo ang side mirror sang tagreklamo.