PLTCOL Jovie Espenido, naganahan pa gid magtrabaho sa direkta nga mandu ni PDuterte nga papason ang mga durugista sa Bacolod City

By: Aine Grace Bravo | October 18, 2019

via CNN Philippines

Manila — Mas nahatagan sang inspirasyon si Police Lt. Col. Jovie Espenido nga magtrabaho bangud sang direkta nga mandu sa iya ni Presidente Rodrigo Duterte nga papason ang mga durugista sa Bacolod City.

Suno kay Espenido nga ginpahamtang bilang chief for operations sang Bacolod City Police Office, naghatag sa iya sang high morale ang mga tinaga sang presidente.

Pero ginpahayag man niya nga bilang pulis, may mandate siya nga proteksyunan ang kabuhi kag propiedad sang mga tawo.

Kun may malapas nga human rights, siya man gihapon ang manabat.

Ginpasiguro ni Espenido nga maga-agi sa husto nga proseso kag may verification kag validation sa mga police operations.

Ang pahayag ginhimo ni Espenido matapos ang statement ni Presidente Duterte nga hilway ang police official nga patyon ang mga durugista sa Bacolod City, “You are free to kill everybody.”

Sa speech sang Miyerkules sang gab-i, ginpahayag ni Duterte nga apektado na gid sang druga ang Bacolod City rason nga ginpadala niya si Espenido.

Nangin kontrobersiyal si Espenido bangud sa pagkapatay sang mga narco politicians sa mga areas sa diin siya na-assign pareho sang Albuera sa Leyte kag Ozamiz City.

Oktubre 15 sang nag-abot si Espenido sa Police Regional Office 6 kag iya ginpahayag nga sayluhon niya sa Nob. 2 ang birthday sang mga durugista kun indi pa mag-untat sa ila illegal nga aktibidad.