Insidente sang ‘tuwalya boys’ case, closed na – TMVF Head Nestor Canong

By: JoMaque | Oktubre 19, 2019, 8:14am

Iloilo City — Case closed na ang insidente sang ‘Tuwalya Boys’ suno kay Task Force on Morals and Values Formation head Nestor Canong.

Nakapadala na sang sulat ang Western Institute of Technology (WIT) kag ang McDonald’s suno kay Canong bilang sabat sa paathag nga ginapangayo ni Mayor Jerry Treñas.

Ginsapul ni Canong ang WIT kag McDo representatives kag ila ginpa-athag ang ila parte sa insidente.

Nagpangayo sang pasaylo ang WIT suno kay Canong ilabi na ang maestro sang tatlo ka mga estudyante. Gin-ako niya nga may kakulangan siya sa superbisyon sa ginhimo sang iya mga estudyante. Wala nagdumdom ang maestro nga matampi sang tuwalya ang mga kabataan kag ma-order sa McDo dugang pa ni Canong.

Nahibaluan nga indi lang tatlo kundi 10 ang mga estudyante nga involved sa activity.

Samtang nagpa-athag ang McDo kun ngaa wala nila ginsaway ang tatlo nga nagatampi lang sang tuwalya sang nag-order. Ginpahayag suno kay Canong sang operations manager sang McDo nga wala sila naga-discriminate sa ila customers anuman ang ila suksok. Importante suno iya nga wala nagapanakit sa iban nga mga customer.

Ginpahayag ni Canong nga ginpa-idalUm sa stress debriefing ang ang mga kabataan bangud na-apektuhan sila sa natabu.

Setyembre 21, nakuhaan sang litrato sang isa sa mga customer sang McDo ang tatlo ka mga lalaki nga naga-order sang sa McDo kag sa ulihi nahibaluan nga parte ini sang ila social experiment.