Job hire sang city gov’t kag tokhang surrenderer sang Tacas, Jaro, gintiro patay sang riding-in-tandem sa Tabuc Suba, Jaro

By: JoMaque | Oktubre 19, 2019, 8:18am

Iloilo City –Patay ang tokhang surrenderer sang Tacas, Jaro sang gintiro sang riding-in-tandem sa birthday party sa Zone 3 Tabuc Suba, Jaro kagab-i, Oktubre 18.

Gindala pa sa ospital si Felix Arjenal Jr., 30-anyos sang Tacas, Jaro pero gindeklarar nga napatay.

May patal nga pilas sa ulo ang biktima.

Suno kay Rodel Londres, abyan sang biktima, nagainom-inom sila kag naga-videoke sang gulpi nagsulod ang suspetsado kag nagpalupok dala tiro sa biktima.

Pito ka lupok ang nabatian antes nakit-an nga nagakulob kag duguon ang biktima.

Duha ka riding-in-tandem ang nag-atake sa lugar kag isa ang nagpangtiro samtang lookout naman ang nabilin.

Sang nagguwa ang nagpangtiro, nagpalupok pa siya sang isa ka bes antes nagpalagyo.

Una na nga ginkumpirmar ni Tacas, Jaro Punong Barangay Joseph Porral nga tokhang surrenderer sa Jaro Police Station ang biktima.

Si Arjenal ang naga-trabaho bilang job hire sa City Hall base sa kumpirmasyon sang iya iloy nga si Mrs. Flor Arjenal.