Mag-ulutod nga gin-rescue sang CSWDO sa Bo. Obrero kasunod sa pag-viral sang ila litrato nga nagapangayo sang pagkaun, nakuha na sang ila ginikanan

By: JoMaque | Oktubre 19, 2019, 8:11am

Iloilo City (UPDATE) – Nakuha na sang ila ginikanan ang mag-ulutod nga gin-rescue sang mga personnel sang City Social Welfare and Development Office (CSWDO) sa Bo. Obrero sang damlag lang.

Matandaan, nag-viral ang litrato sang mag-ulutod nga nagapangayo sang pagkaun. Nagapang-edaron ang mga na-rescue sang 19-anyos, 12-anyos, 10-anyos, 7-anyos kag 3-anyos kag ang 1 year-old nga bata sang 19-anyos.

Nagsapol kaina sang aga ang barangay officials sang Bo. Obrero sa pagpanguna ni Punong Barangay Ricardo Diño Jr, social workers sang La Paz kag taga-CSWDO kag ginikanan sang kabataan.

Suno kay Alyas Nida, nakuha na niya ang iya lima ka kabataan sa Crisis Intervention Unit.

Indi na magbalik sa Manila si Nida kag diri na lang sa Iloilo mapangita ang obra kag tinguhaan man sang iya bana nga makakita sang obra sa Iloilo.

Nagbalik ang pamilya sa ila balay kag gina-amat-amat panghimus ang sulod.

Nagpasalig si PB Diño nga buligan si Nida agud maka-apply nga lady guard sa security agency sang iya abyan.

Nagpromisa man suno kay Diño si Rara Ganzon, CSWDO Social Welfare Officer 1 kag Focal person for Local Comittee on Anti-Trafficking and Violence Against Women and their Children, nga buligan ang bana ni Nida nga makasulod nga job hire sa DPWH.

Samtang mabulig ang mga barangay officials suno kay Diño nga makabalik sa pag-eskwela ang kabataan.