Pagsaylo sang Judging Area No. 2 halin sa atubang sang Old Provincial Capitol, indi lang bangud sa isyu sang seguridad — IFFI President Atty. Jobert Peñaflorida

By: JoMaque | Oktubre 19, 2019, 8:16am

Iloilo City (UPDATE) — Indi lang bangud sang isyu sa seguridad ang gintumod nga rason sang Iloilo Festivals Foundation, Incorporated (IFFI) sa pagsaylo sang judging area number 2 halin sa atubang sang Old Provincial Capitol pakadto sa corner Iznart-Solis Streets, City Proper para sa Dinagyang 2020.

Suno kay IFFI President Atty. Jobert Peñaflorida, posible natuhoy sa isyu sa seguridad ang na-mention sang mga Board of Trustees sang IFFI sang nagsapol sila kay Governor Arthur Defensor Jr., apang magluwas sini, ginakonsiderar man ang praktikalidad, paghingyo sang mga participating tribes kag ang pag-implementar sang 360 degree ukon mas malapad nga espasyo para makalantaw sang performance.

Paagi sa lihok, malikawan ang pagpugok sang traffic flow sa pagtukod sang judging areas. Dugang diri, mahimo man magamit ang Muelley Loney bilang alternative route sa mga salakyan.

Ginpanginwala naman ni Atty. Peñaflorida nga may ‘security threat’ sa judging area number 2.

Dugang niya, mas maayo kun malimitahan ang lugar agud mas mabantayan man sang maayo sang pulis.

‘SILA SA GIHAPON ANG MADUMALA’

Bisan ginsaylo ang lugar, nadesisyunan sang IFFI nga ipabilin sa Iloilo Provincial Government ang pagdumala sa juding area number 2.

Nagadepende sa Provincial Government kun sin-o ang imbitarun nila nga mga bisita sa amo nga stage.

May executive order man nga gin-issue si Mayor Jerry Treñas natuhoy diri suno kay Peñaflorida.

Una na ginpahayag ni Governor Defensor nga padayon ang ila pagsuporta sa city government kag IFFI bisan indi na pagpahamtang ang judging area sa atubang sang Old Provincial Capitol.