24th Unigames nga gina-host sang University of San Agustin, ginpasakupan sang linibo ka atleta halin sa mga universities sa bug-os nga pungsod

By: Aine Grace Bravo | October 21, 2019

via Hotline

Iloilo City — Wala ginalauman sang University of San Agustin ang madamo nga numero sang mga atleta nga nagpasakop sa 24^th Philippine University Games.

Suno kay Mr. Demosthenes Toledo, sports director sang USA, isa sa mga ginalantaw nga rason sang pagdamu sang participants sa Unigames nga matawhay kag malimpiyo ang Iloilo. Magluwas sini, nahibaluan man sang mga participants nga strategic location ang siyudad kag makabig nga gateway sang Boracay kag iban pa nga tourist destinations sa Rehiyon 6.

Ginabanta sa tatlo ka libo ka mga atleta halin sa 41 ka mga unibersidad sa Luzon, Visayas kag Mindanao ang nagkumpirmar sang ila partisipasyon sa 24^th Unigames nga nagsugod kahapon, Oktubre 20 kag magalawig sang isa ka semana.

Ini ang ikaduha nga tiun nga nag-host ang USA sang Unigames.

Una nga nag-host ang USA sang Unigames sang 2014 sa diin masobra 30 ka mga unibersidad ang nagpasakup.