ArchivesLokalUncategorized

Suspek sa pagpangluthang sa San Jose, Antique, handa mag-atubang sa ginpasaka nga mga kaso sa iya

By: JoMaque | Oktubre 23, 2019, 1:22pm

Antique (UPDATE) – Atubangon sang 22 anyos nga suspek sa pagpangluthang sa computer shop sa Brgy. Atabay, San Jose, Antique kahapon ang mga kaso nga ginpasaka sa iya.

Ini ang pahayag ni Venom Dio Vergara sang amo man nga lugar sang ginpasakaan sang mga kaso kaina sang hapon.

Ginpasakaan si Vergara sang duha ka counts sang murder with the use of unlicensed firearm (bangud sa pagkapatay sang duha ka biktima); duha ka counts sang direct assault with frustrated homicide (sa pagkapilas sang duha ka nagresponder nga pulis); isa ka frustrated murder (sa pagkapilas sang media correspondent) kag isa ka direct assault with attempted homicide (sa isa pa ka pulis nga wala naigo sa pagpangluthang ni Vergara).

Suno kay PLTCOL Mark Anthony Darroca, hepe sang San Jose MPS, kilala sa ila lugar nga ‘impulsive’ si Vergara. Sang gindakup siya kahapon, ginhambal ni Vergara nga ‘ginloko’ siya, pero wala na siya sang ginhatag nga dugang nga detalye.

Base sa impormasyon, nagapangaluyag si Vergara kay Ana Anacleto, 24 anyos nga nagatrabaho sa computer shop, pero wala man siya ginasapak bangud may nobyo ang babaye.

Napatay si Anacleto kag si Ervin James Checa, 32 anyos nga tag-iya sang computer shop.

Pilason naman sanday Stephen Louise Checa, correspondent sang Panay News sa Antique kag magulang sang napatay nga si Ervin James, kag ang mga nagresponder nga kanday Corporal Albert Talidong kag Staff Sergeant Cyrell Valdevieso.

Gin-athag naman ni PLTCOL Darroca nga indi mapasakaan sang kaso ang amay ni Vergara nga amo ang nagapanag-iya sang 9mm nga may expired license nga gingamit sa krimen.

Pagkatapos nadakpan si Vergara, gin-surrender sang iya amay sa mga pulis ang shotgun kag 45 caliber nga expired man ang mga lisensya. Pero indi makasuhan ang amay sang suspek bangud wala man nakuha sa iya ang mga pusil paagi sa operasyon.

Dugang nga paathag ni Darroca, may programa ang gobyerno nga indi pagdakpon ang gun owner nga mag-surrender sang iya pusil nga expired ang lisensya.

Leave a Reply