Groundbreaking sa sanitary landfill sa Passi City, ginhiwat kaina sang aga

By: Aine Grace Bravo | October 24, 2019

via BBB

Passi City, Iloilo — Ginhiwat kaina sang aga ang groundbreaking para sa ipatindog nga sanitary landfill sa Passi City.

Gin-athag ni Passi City Mayor Stephen Palmares nga wala sang gastuhon ang siyudad sa amo nga proyekto nga himuon sa idalum sang Public-Private Partnership ukon PPP.

Mangin state-of-the-art ang pasilidad sa Barangay Aglalana suno kay Palmares nga nagabalor sang P308-million kag gastuhan sang Manila-based nga kompaniya nga IPM.

Ang landfill sa Passi City, maga-cater sang residual wastes halin sa 28 ka mga local government units lakip dire ang halin sa Badiangan, Bingawan, Cabatuan, Calinog, Janiuay, Lambunao, Maasin, Mina, kag Pototan sa Third District; Anilao, Banate, Barotac Nuevo, Dingle, Dueñas, Dumangas, kag San Enrique sa Fourth District; kag Ajuy, Balasan, Barotac Viejo, Batad, Carles, Concepcion, Estancia, Lemery, San Dionisio, San Rafael kag Sara sa Fifth District.

Ginalauman nga mangin operational ang una nga cell sang landfill sa sulod sang anum ka bulan tubtob isa ka tuig.