Masobra 200 ka balay, nasunog sa Boracay

By: Aine Grace Bravo | October 24, 2019

via Yes FM Boracay

Boracay — Masobra 200 ka mga pamalay ang nasunog sa Sitio Ambulong, Manoc-manoc, Boracay las 8: 45 kaina sang aga.

Nagsugod ang sunog sa Station 3 sang isla kag madasig nga naglapta sa mga pamalay nga kalabanan boarding houses sang mga empleyado.

Naglab-ot pa sa highest alarm ang sunog nga naglawig sang halos duha ka oras.

Ginkumpirmar ni Manoc-manoc Punong Barangay Nixon Sualog nga ang mga pamalay nga nasunog nahamtang sa Muslim Village, 50 metros lang ang kalayuon halin sa mosque sa area nga nagakasunog.

Sa Facebook live ni Mr. Alan Palma, station manager sang Yes the Best Boracay, ma-obserbahan nga makitid pasulod sa area sa diin nagluntad ang sunog kag indi na masulod sang mga firetrucks.

Kinahanglan pa nga sugpun-sugpunon ang hose sang mga nagresponder nga firetrucks agud malab-ut ang fire scene nga may 300 metros ang kalayuon halin sa main road.

Padayon nga ginahibalo sang Bureau of Fire Protection ang ginhalinan sang kalayo kag kun pila ang kahalitan.