1st ‘Umbrella Festival’ dayon bisan ginpasugtan ang pagbalik sang trapal sa mga pumpboats sa Iloilo-Guimaras shipping route –DOT 6

By: Aine Grace Bravo | October 25, 2019

via Hotline

Iloilo City–Dayunon sang Department of Tourism 6 ang “Umbrella Festival” para sa mga sumalakay sang pumpboats nga nagabiyahe Iloilo-Guimaras kag vice versa.

Suno kay DOT 6 Director Helen Catalbas, ini bisan pa nga ginpasugtan na ang pagbalik sang trapal sa pumpboats.

Indi bilog nga pumpboat suno sa iya ang masakop sang trapal base sa kundisyon nga ginplastar sang Department of Transportation kabangdanan may magakinahanglan gihapon sang payong.

Sa programa nga gintawag nila temporaryo “Umbrella Festival” may ihatag nga mga payong sa mga pasahero sang pumpboats pero ila man ibalik pag-abot sa puerto.

Nadihon ini nga programa suno kay Catalbas bangud sa reklamo sang mga pasahero nga mainit kun magbiyahe bangud wala sang trapal ang pumpboats.

Samtang nagahulat sadto sa resulta sang apelasyon sang mga taga-Guimaras, nakasugtan ini nga solusyon sang DOT kag sang local government agud makabulig sa mga pasahero ilabe na nga 10 porsiento na lang ang tourist arrivals sa isla halin sang nagluntad ang August 3 sea tragedy nga nagbilin sang 31 nga patay.

Ginpahayag ni Catalbas nga ginhambalan siya sang mga local officials sang Guimaras nga indi pag-i-kanselar ang programa kundi i-modify lang.

Una gintalana sa Nobyembre 9 ang launching sang festival pero posible nga matemprano ini bangud sang ginapa-abot pagdugok sang mga pasahero sa piesta minatay.

I-sponsor sang DOT ang mga payong.

P100,000 ang pondo sang ahensiya para sa programa.