Oton police, nakadakup sang 53 ka violators sa ordinansa nga nagadumili sang magahud nga tambutso

By: Aine Grace Bravo | October 26, 2019

via AM Reports

Oton, Iloilo — 53 ka violators ang nadakpan sang Oton police sugod sang ginpatuman ang Municipal Ordinance No. 2018-322 ukon Anti-Modified Muffler Ordinance sang banwa.

Suno kay PEMS Gaudioso Yudelmo, deputy chief of police sang Oton Police Station, nagsugod sila sa pag-operate batuk sa mga motorsiklo nga may magahod sang tambutso sa ulihi nga nga semana sang Hulyo kag nagapadayon tubtub subong.

Gin-athag ni Yudelmo nga wala sila device nga nagatakos sang gahod.

Kun mahibaluan sang police suno sa iya nga magahod ang motorsiklo, ginapapundo ang driver kag gina-check ang tambutso.

Ginpahayag ni Yudelmo nga wala man sang may nagkuwestyun ukon nagreklamo sa pagpatuman nila sang ordinansa.

Sa mga nadakpan nga violators, may yara nga boluntaryo nga nagakakas sang iya modified muffler matapos nga mapaathagan sa ila violation sa ordinansa.

Base sa ordinansa sang banwa, sa 1st offense pa lang ,magamulta sang P1,000 ang violator, i-confiscate ang driver’s license kag kakason ang modified muffler.

Ginatun-an naman suno kay Yudelmo sang taga-Municipal Traffic Management Office kun ano ang himuon sa mga nakumpiskar nga modified mufflers.