ArchivesLokal

PSTMO, wala sang nadakpan sa una nga gab-i sang pag-implementar sang Anti-Modified Mufflers Ordinance

By: Aine Grace Bravo | October 26, 2019

via Hotline

Iloilo Ciity–Ginsuguran kagab-i, October 25, sang Public Safety and Transportation Management Office (PSTMO) ang operation batok sa mga salakyan nga magahod ang tambutso.

Upod sang PSTMO ang Iloilo City Police Office sa pagpatuman sang City Ordinance No. 2017-087 ukon ang ordinansa nga nagadumili sa pagbaligya, installation kag paggamit sang modified muffler sa mga pampubliko kag pribado nga salakyan sa siyudad nga nagatuga sang tuman kag maka-iritar nga gahod.

Suno kay PSTMO head Jeck Conlu, nagsentro ang ila operation sa City Proper kagab-i.

Wala naman sang nadakpan ang team bangud wala suno kay Conlu sang may naglapaw sa 115 decibel nga limit.

Suno kay Conlu, kumpiskaron ang lisensiya kag isyuhan sang temporary operator’s permit ang driver nga maglapaw sa 115 decibel ang gahod sang tambutso.

Magawad lang ang lisensiya kun mabayaran ang multa.

Kun magpalagyo ang driver, dal-un siya sa police station kun maabtan kag ipa-blotter suno kay Conlu kag posible nga pasakaan sang reklamo sa Land Transportation Office.

Ginpa-athag naman ni Conlu nga indi lang limitado sa motorsiklo ang ordinansa.

Sa idalum sang ordinansa, magamulta sang P1,000 ang madakpan naglapas sa una nga offense, P3,000 sa second offense kag P5,000 kag kumpiskaron ang muffler sa third offense.

Ginpasiguro ni Conlu nga sige-sige na ang ila himuon nga operation kag indi lang sa gab-i kundi pati sa adlaw, maga-operate man sila.