Pulis sa Jaro, arestado matapos nagmaoy sang naabtan nga wala pa ang iya asawa sa ila boarding house

By: Aine Grace Bravo | October 26, 2019

via Brian Valle

Iloilo City — Arestado ang 30-anyos nga pulis nga assigned sa Jaro Police Station matapos nagmaoy sang nahibaluan nga wala ang iya asawa sa ila ginatineran nga balay sa Brgy. Javellana, Jaro las 11:30 kagab-i.

Ginkilala ang pulis kay Patrolman Jhenil Ejudo, 30-anyos sang Brgy. Iwa, Pototan.

Base sa report, nag-abot si Patrolman Ejudo las 11:30 sa ila boarding house kag nahibaluan nga wala ang iya asawa rason nga nagmaoy siya.

Ginapatihan nga naka-inom ang pulis gani gintinguhaan sang tag-iya sang boarding house nga si Jopryx Dueñas nga pakalmahon apang ginhangkat man siya sang inaway

Nagtawag sang barangay tanod si Dueñas kag ginpadakop si Ejudo nga yara na subong sa kustodiya sang Jaro police.

Nagpamalibad na nga magpa-interview si Ejudo.

Suno naman alyas Christine, 30, asawa sang pulis, wala sila sang may gin-awayan sang iya bana kag nagkadto lang siya sa balay sang iya abyan malapit sa ila boarding house.

Sang nagpuli si Christine, nakibot siya sang nakita nga may yara na sang police patrol car sa guwa sang ila boarding house.

Ginpahayag ni Christine nga nagmaoy ang iya bana sa pagpati nga naglayas siya.

Napulo pa lang ka bulan nga kasal ang mag-asawa.

Hingagawon naman sang Jaro police nga pasakaan sang kaso nga alarm and scandal subong nga adlaw si Patrolman Ejudo.