19-anyos nga babaye, ginapatihan ginhimuslan antes ginbuno-patay sa Janiuay; Menor-de-edad nga isa sa mga suspetsado, arestado

By: JoMaque | Oktubre 27, 2019, 8:33am

Iloilo — Patay na sang nasapwan sa talamnan ang 19-anyos nga babaye sa Brgy. Abangay, Janiuay mga las 6:40 kagab-i, Oktubre 26.

Suno kay Police Captain Dadjie Delima, hepe sang Janiuay Police Station, nasapwan si Ronalyn Bravio nga hublas, may patal nga pilas sang pagkabuno kag ginapatihan ginhimuslan.

Duha ang suspetsado sa krimen suno kay Delima. Nadakpan suno sa iya ang 15-anyos nga solterito.

Sa imbestigasyon sang Janiuay police, ginsugid sang menor-de-edad nga suspek nga nagbakal sa tiyangge ang biktima kag sang nagpauli, ila ginbanggaan kag ginguyod sa pakadto sa talamnan.

Ginpahayag ni Delima nga maligwin ang lugar nga gindal-an sa biktima.

Ginsugid man suno sa iya sang menor-de-edad nga ice pick ang gingamit sa pagbuno sa biktima.

Gin-ako naman sang solterito nga “natandog” niya ang biktima pagkatapos sang una nga suspek nga ginkilala kay Reymark Estoque, 18-anyos sang Canawili, Janiuay.

Suno sa menor-de-edad, ginpahog siya ni Estoque nga patyon kun indi niya pag-updan kag himuon ang ginasugo sa iya.

HUSTISYA PARA SA DALAGA

Suno kay Ronaldo Bravio, amay sang biktima nga si Ronalyn, nagbakal sa tiyangge ang iya bata kag natingala siya nga wala nakapauli ang biktima sang magab-i na.

Ginpangita ang dalaga kag may nakasugid sa amay nga nakit-an ang cellphone kag tsinelas ang iya bata.

Nasapwan ang biktima nga hublas sa talamnan, naggapos ang kamot gamit ang iya bra kag sako nga naga-id sa kawayan, naggapos man ang tiil gamit ang bayo kag naga-kuga sa liug niya ang sako.

May pilas sang pagkabuno ang dalaga.

Nagapati man ang amay nga una ginlampusan ang biktima antes ginhimuslan.

Nagapanawagan sang hustisya ang pamilya.