Mangunguma, patay sang nabun-an sang kasubong nga mangunguma sa Janiuay

By: JoMaque | Oktubre 27, 2019, 8:36am

Iloilo — Patay ang 53-anyos nga mangunguma sang nabun-an sang pakaisa sang iya asawa sa Canawili, Janiuay kagab-i, Oktubre 26.

Ginkilala ang biktima kay Enrique Ganancial nga residente sang amo nga lugar. Samtang suspek naman si Leo Paesaje, 54-anyos.

Suno kay Jamila, bata sang biktima, naga-inum-inom ang iya amay kag suspek antes natabo ang krimen.

Matulog na kuntani ang suspek pero indi siya makatulog bangud magahod kag nagakumod ang biktima. Gin-ako ni Jamila nga magahod gid man ang iya amay kun mahubog.

Nagpalayo si Paesaje pero nagpanghangkat si Ganancial sang inaway tubtob may natabo nga komosyon.

Kasunod sini, nasapwan ang biktima nga nagahuray-ad sa guwa sang ila balay kag naga-ungot pa ang kutsilyo sa idalom sang iya dughan.

Gilayon nga nagpalagyo ang suspek nga napilasan man.

Ginkumpirmar ni Police Captain Dadjie Delima, hepe sang Janiuay Police Station nga yara sa ospital si Paesaje kag ginabulong.