(UPDATE) 42 anyos nga suspek sa paglugos patay sa 19 anyos nga dalaga sa Janiuay, nag-ako sa krimen; suspek, nagpabutyag nga obsessed siya sa iya pakaduha

By: Aine Grace Bravo | October 28, 2019

via Francis Basco/BBB

Janiuay, Iloilo — Gin-ako ni alyas John, 42 anyos sang Abangay, Janiuay, nga siya ang naglugos kag nagpatay kay Ronalyn Bravio, 19 anyos.

Ini ang ginkumpirmar ni PCT Dadjie Delima, hepe sang Janiuay Police Station.

Suno kay Delima, gin-ako ni John nga obsessed siya sa iya pakaduha gani nakomiter niya ang krimen.

Una nga ginpaninwala kahapon sang suspek nga siya ang naghimulos kag nagpatay kay Ronalyn bisan pa mismo bata niya nga 15-anyos, nga upod man niya sa krimen, ang nagtudlo sa iya.

Ginapreparar na suno kay Delima ang kaso nga rape with homicide batuk kay John.

Himuon naman nga witness sa kaso ang iya bata nga si alyas Toto.

Suno kay Delima, consistent ang panaysayon ni Toto halin sa paglambat sang iya amay sa biktima tubtob sa kun paano ginhimo ang pag-rape kag pagpatay.

Ginsugid man ni Toto nga ginpuwersa siya sang iya amay nga himuslan ang biktima.

Gintuyo pa ni John nga ilubong si Ronalyn pero nag-ayo si Toto nga indi lang bangud luyag niya mabuhi ang dalaga.

Antes ang krimen, may insidente suno kay Delima nga nadakpan na si John nga ginlingling ang biktima.