Linog sa North Cotabato, indi maka-apekto sa Panay suno sa PHIVOLCS

By: Aine Grace Bravo | October 30, 2019

via KhenJo Terco

Wala sang dapat kabalak-an ang mga taga-Panay Island kasunod sang magnitude 6.6 nga linog nga nagtay-og sa Tulunan, North Cotabato kahapon sang aga.

Paathag ini ni Mr. Jo Arlou Zabar sang PHILVOCS Aklan.

Suno kay Zabar indi konektado ang mga fault line sa Mindanao sa fault line nga makit-an sa Panay.

Tuman kalayo sang Mindanao sa Panay suno kay Zabar gani imposible nga mabatyagan pa diri ang pagtay-og.

Kun may pagtay-og man nga mabatyagan, ina bangud sa mga shock wave. Pero gin-athag ni Zabar nga nagakabatyagan lang ini sa mga lugar nga malapit sa epicenter kag kun mabaskog ang linog.

Gin-plastar man ni Zabar nga nagakatabo lang ang mabaskog nga linog kun naga ‘lock’ ukon madugay nga wala nakahulag ang fault line. Bangud wala nagahulag, nagatipon ang pwersa suno kay Zabar gani mabaskog ang pagtay-og nga mabatyagan sa tiun nga maghulag ang fault line.

Ang pinakamalapit nga fault line sa Panay, amo ang West Panay fault kag ang Negros trench.

Adlaw-adlaw may movement nga ma-monitor ang PHILVOCS sa mga nasambit nga fault line gani wala sang mabaskog nga paghulag nga dapat kabalak-an sa Panay dugang pa ni Zabar.

Ang West Panay fault, nagalabay sa kabukiran sang Aklan, Antique, Capiz, kag Iloilo.