Cashier, gintampa sang kahita sang kustomer sa Jaro

By: JoMaque | Oktubre 31, 2019, 11am

Iloilo City—Gin-aresto ang 61-anyos nga babaye matapos gintampa niya ang cashier sang Savemore Jaro pasado las 6:00 kagab-i.

Ginkilala ang arestado kay Josephine Marmolejo sang Magsaysay, Maasin.

Ginreklamo si Marmolejo ni Angelica Secoya, 20-anyos sang PD Monfort North, Dumangas.

Nag-ugat ang insidente sang nagbayad sa Counter 9 si Marmolejo apang na-supladahan siya kay Secoya matapos ginbalik sang cashier ang advantage card sa indi maayo nga aktuwasyon.

Gintampa ni Marmolejo sang wallet si Secoya bisan madamo sang tawo.

Ginpanghiwala naman ni Marmolejo nga gintampa niya si Secoya kag nanindugan nga ginkuhit niya lang sa guya ang kahera.

Pero nakuhaan sang CCTV footage ang natabu kag ginsuportahan man sang isa pa gid ka kustomer nga nagasunod kay Marmolejo ang akusasyon ni Secoya.

Una ginpreso si Marmolejo sa Jaro Police Station pero nagpa-hospital arrest bangud nagpin-ut ang iya dughan.

Ginkasuhan gid sang cashier ang kustomer sang slander by deeds kag unjust vexation.