ArchivesLokal

Indi big deal–hepe sang Estancia MPS sa pagsipa sa iya ni IPPO Director Roland Vilela

By: Aine Grace Bravo | November 1, 2019

via Hotline

Estancia, Iloilo — “Indi big deal sa akon. Part lang sang disiplina sa amon organisasyon.”

Ini ang pahayag ni Police Major Rene Obregon Jr, hepe sang Estancia Police Station sa pagsipa sa iya ni Police Colonel Roland Vilela, ang director sang Iloilo Police Provincial Office kahapon, Oktubre 31, sa guwa sang patyo sa Estancia.

Gin-ako ni Obregon nga may sala sa pagplastar sang mga signages pati na sa pagbaligya sang mga kandila sa sulod kag guwa sang patyo kag may rason ang IPPO Director nga mangakig.

Leksyon ini suno sa iya sa ila para magpreparar sa masunod nga mga coverages sang mga dalagku nga event pareho sang Piesta Minatay.

Wala na nagdetalye pa si Obregon kun diin siya ginsipa ni Vilela pero base sa report ni Jerry Medina, correspondent sang Aksyon Radyo Iloilo sa Northern Iloilo, naigo ang hepe sa ibabaw sang iya tuhod. Natabu ini sa atubang sang mga vendors.

Ginpahayag naman ni Vilela sa interview sang Aksyon Radyo, nga maathag ang iya instruction nga dapat magpreparar ang mga pulis sang traffic plan sa guwa sang sementeryo agud malikawan ang pagginutok.

Naakig man si Vilela sang nakita nga indi maayo ang pagsuksok sang uniporme sang mga pulis.

Pasado las kuwatro kahapon sang hapon sang ginbisita ni Vilela ang patyo sa Estancia kag natabuan nga yara man sa area si Obregon.

Magluwas sa Estancia, ginkadtuan man ni Vilela ang iban pa nga kabanwahanan.