ArchivesLokalUncategorized

IPPO Director PCOL Roland Vilela, naakig sa mga pulis sang Estancia bangud wala naplastar ang mga vendors kag parking sa guwa sang sementeryo; Hepe, ginsipa ni Vilela suno sa isa sa mga vendors

By: JoMaque | Nobyembre 1, 2019, 10:38am

Estancia, Iloilo – Ginsipa ni Iloilo Police Provincial Office Director PCOL Roland Vilela ang hepe sang Estancia Police Station sang nakita nga wala naplastar sang ensakto ang mga naga-park nga motorsiklo kag tricycle kag mga vendors sa guwa sang Municipal Cemetery.

Natabu ini kahapon, Oktubre 31, sang naglibot si Vilela sa preparasyon sang mga police stations sa kabanwahanan para sa Piesta Minatay.

Suno sa isa sa mga vendors, akig si Vilela sang nagpanaug sa salakyan kag ginsinggitan ang mga pulis. Nakita niya man nga ginsipa ni Vilela si Major Rene Obregon Jr.

‘PARTE SANG DISIPLINA’

Gin-ako ni Major Obregon nga may kakulangan siya sa preparasyon para sa Piesta Minatay rason nga nag-istorya siya kay Mayor Melina Requinto may kaangtanan sa plastaran sang mga vendors kag parking area subong kag buwas.

Sang ginpamangkot naman kun matuod nga ginsipa siya sang IPPO director, ginsabat sang hepe nga kabahin lang ini sang disiplina.

‘PAATHAG NI PCOL VILELA’

Na-akig si Colonel Vilela bangud daw ginbalewala sang pila ka mga chiefs of police ang iya instruction may kaangtanan sa Piesta Minatay.

Suno kay Vilela, maathag ang iya instruction nga magpreparar sang traffic plan sa guwa sang sementeryo agud malikawan ang paginutok. Indi man suno sa iya pwede nga na-okupar na sang mga vendors ang sidewalk sa guwa sang patyo bangud sa karsada na naga-agi ang mga tawo.

Nagdugang man sa kaakig ni Vilela bangud ‘wala sa ayos’ ang uniform sang mga pulis.

Sang ginpamangkot naman si Vilela kun ginsipa niya gid man si Obregon, iya ginsabat nga ‘marami sila’ bangud nag-check man siya sa iban pa nga mga police stations.

Leave a Reply