ArchivesLokal

Pag-obserbar sang mga Ilonggo sang Piesta Minatay, matawhay

By: Aine Grace Bravo | November 1, 2019

Iloilo — Matawhay ang pag-obserbar sang mga Ilonggo sang Pista Minatay.

Sa obserbasyon sang Aksyon Radyo News Team, amat-amat nga nagdugok ang mga tawo sa mga sementeryo halin las-4 kaina sang hapon.

Naka-deploy sa guwa sang mga patyo ang mga pulis kag force multipliers nga nagapatuman naga-check sa tanan nga nagasulod kag nagakumpiskar sang mga kontrabando kag nagadumala sang trapiko agud malikawan ang paginutok.

Ginadumilian sa sulod sang sementeryo ang makahulubog nga ilimnon, gambling paraphernalia, mga hinganiban kag tanan nga matalum nga bagay.

Sa Jaro Cemetery, lakip sa nakumpiskar ang mga ballpen, samtang may mga nakumpiskar man nga gamit kuntani sa pagpaninlo sa pantiyon pareho sang pala.

May mga nagalibot man nga pulis kag force multipliers sa sulod sang sementeryo kag may naplastar nga help desk sa guwa agud mapangayuan sang bulig.

Nagabulig man sa PNP kag mga force multipliers sa pagmentinar sang kalinong kag katawhay ang iban pa nga government agencies, Red Cross kag team halin sa local government units.