Coast Guard Iloilo, padayon nga nagabaton sang bulig nga ipadala sa mga na-apektuhan sang mga linog sa Mindanao

By: JoMaque | Nobyembre 3, 2019, 10:10am

Iloilo City – Nagabaton pa ang Coast Guard Iloilo Station sang mga bulig para sa mga na-apektuhan sang mga linog sa Mindanao.

Suno kay Captain Erlinda Benliro, commander sang Coast Guard Iloilo, pwede pa nila mabaton ang mga bulig sa sulod sang apat tubtob lima ka adlaw.

Nagapanguna nga kinahanglan sang mga nalinugan ang bugas, canned goods, noodles, bottled water, trapal, tents, banig, mosquito nets kag mga bulong.

Kagab-i, nabiyahe na ang una nga batch sang mga food packs (halin sa DSWD 6) sakay sa Cape Engaño nga barko sang PCG.

Sa luyag maghatag sang bulig, mahimo suno kay Captain Benliro nga magpadulong sa ila opisina sa Parola.