4 pulis sa Boracay nga nadakpan wala sa ila area of assignment, nagahampang sa cellphone, gina-imbestigaran sang Aklan PPO

By: Aine Grace Bravo | November 5, 2019

via Aljohn Torreta

Aklan — Gina-imbestigaran sang Aklan Police Provincial Office ang apat ka mga pulis nga ginpenahan sa Police Regional Office 6 paagi sa physical exercise matapos nadakpan nga wala sa ila poste kag ang iban ang nagahampang sa ila cellphone.

Ini ang ginkumpirmar ni Lt. Col. Joem Malong, spokesperson sang Police Regional Office 6.

Suno kay Malong, posible Simple Neglect of Duty ang ipasaka batuk sa apat ka mga pulis nga lunsay mga Patrolman ang rangko.

Ang Aklan Investigation and Detective Management Division ang naga-imbestigar sa natungdan nga mga pulis nga ginabug-usan sang tatlo ka lalaki kag isa ka babaye.

Ginpatawag kag ginpa-physical exercise sa Kampo Delgado ang apat ka mga pulis kahapon matapos nadakpan ni Police Colonel Remus Zacharias Canieso, Deputy Regional Director for Administration, sa iya inspection.

Nagpa-andam naman si Canieso sa mga natungdan nga pasakaan sila sang kaso administratibo kun liwat nga mag-commit sang nasambit nga violation.

Gintinguhaan pa sang Aksyon Radyo Iloilo nga makuhaan sang pahayag ang natungdan nga mga pulis.