Sa 16 siyudad kag 117 banwa sa Western Visayas, 2 lang ang nakasumiter sang assessment sa structural integrity sang mga imprastruktura sa ila lugar – OCD 6

By: JoMaque | Nobyembre 5, 2019, 8:51am

Iloilo City— Sa 16 ka siyudad kag 117 ka mga banwa sa Western Visayas, duha pa lang ang nakasumiter sang ila assessment report sa structural integrity sang pila ka mga imprastruktura sa ila lugar suno sa Office of the Civil Defense ukon OCD 6.

Suno kay OCD 6 Director Jose Roberto Nuñez nga chairman man sang Regional Disaster Risk Reduction and Management Council, ang Local Government Unit sang Tapaz sa Capiz kag Patnongon sa Antique lang ang nakasumiter sang ila report.

Lunsay mga eskwelahan ang gin-assess sang natungdan nga LGU kag lakip sa ila rekomendasyon ang pag-relocate sang pila ka mga eskwelahan sa indi landslide-prone area.

Sang Abril 23 pa nag-issue sang memorandum si Nuñez kag nagmandu sa tanan nga mga miembro sang RDRRMC kag Provincial/City/Municipal DRRMC sa pag-conduct sang assessment sang mga imprastruktura ilabe na sa mga daan nga establisiemento.

Ini ang pagkatapos man sang asud-asod nga mabaskog nga linog sa Zambales kag Eastern Samar sang Abril.

‘Baka nakalimutan lang’

Posible nalipat lang ang kalabanan nga mga LGU’s sa pagsumiter sang report suno kay Nuñez.

Nag-issue naman sang bag-o nga memorandum si Nuñez nga nagapahanumdom liwat sa mga LGU’s kag partner agencies sa RDRRMC sa pagsumiter sang ila assessment report tubtob las singko bwas sa hapon, Nobyembre 5.

Masulat naman ang opisyal sa Department of the Interior and Local Government (DILG 6) agud ipahibalo ang mga nakasumiter na sang report.

Ginatugyan sang OCD 6 sa DILG 6 ang pag-aksyon sa mga LGU’s nga napaslawan magsumiter sang report.

‘Compliant ang DILG’

Sa tanan nga mga partner agencies naman sa RDRRMC, ang DILG 6 lang ang nakasumiter sang ila assessment report sa structural integrity sang ila nga imprastruktura.

Nakita ang mga litik (minor cracks) sa opisina sang DILG-Guimaras nga resulta sang paglinog sadto.

Magluwas sa DILG, nakasumiter man sang assessment report ang DepEd- Schools Division of Guimaras.

Nakita ang mga litik (major cracks) sa haligi, ding-ding kag salog sang Daragan Elementary School sa Buenavista, Guimaras.

Vice chair sa RDRRMC ang DILG, National Economic and Development Authority, Department of Social Welfare and Development kag Department of Science and Technology samtang miembro naman ang Bureau of Fire Protection, Philippine National Police, Philippine Coast Guard, Philippine Information Agency kag iban pa.

Ginpabutyag ni Nuñez nga importante ang pag-conduct sang assessment agud gilayon nga ma-retrofit ukon ma-rehabilitate ang mga imprastruktura kun kinahanglanon.

‘Lakip ang pribado nga sektor’

Magluwas sa mga opisina sa gobyerno, kinahanglan man ma-subject sa assessment ang mga imprastruktura sa pribado nga sektor.

Importante man nga makahibalo ang mga personnel sang pribado nga kompaniya kun ano ang dapat ubrahon kun may kalamidad.

Nagtanyag ang OCD sang libre nga training sa mga personnel sang pribado nga mga kompaniya.

Ginaduso naman ni Nuñez ang padayon pag-invest sang mga LGUs sa nagakaigo nga equipment agud gilayon nga makaresponder kun may kalamidad.